O blog dos Galeuros

Sumando todos movementos realizados ata a data de hoxe (emisións, circulación, conversión, desemisión…) a nosa moeda vén de superar unha cifra moi importante: os 100.000 galeuros.

Durante o último periodo anual (2009) realizáronse 190 movementos, por un total de case 70.000 galeuros, o cal supón un medre do 283,75% na contía das operacións respecto ao ano anterior.

Outro dato positivo foi que a taxa de circulación medrou, aínda que timidamente, do 23,98% ata o 31,95%, consolidando a tendencia de anos anteriores.

Coidamos que isto demostra o potencial da moeda, que se verá ampliado se o proceso de socialización une a máis actores económicos no seu emprego.

Podes consultar máis cifras sobre os galeuros no seu wiki oficial.

As medidas de redución dos galeuros emitidos pola nosa asociación que foran aprobadas en novembro pola nosa asemblea de socios, remataron onte con éxito.

Así, a día de hoxe Fillos de Galicia ten reducido moi por baixo dos 2.000 galeuros o seu saldo negativo (-657,31 galeuros), co cal queda o sistema perfectamente preparado para se uniren outras entidades en igualdade de condicións, dentro do proceso de socialización devandito.

No noso wiki actualizaremos este dato así como os movementos totais durante o periodo 2009, que de novo, superan as marcas anteriores, amosando a vitalidade e utilidade do galeuros, a moeda social galega.

Grazas a un aviso dunha usuaria dos galeuros, vimos de detectar que existe unha errata na ligazón que se inclúe nas mensaxe que se están a enviar desque pasamos a tenda online de Fillos.org a Galeuros.com

En concreto aparece unha ligazón a http://www.fgaleuros.com/tenda/my_points.php cando debería ser a http://www.galeuros.com/tenda/my_points.php que é a ligazón directa á páxina de saldo e histórico de movementos dos galeuros que posúe cada usuario.

Ademais disto temos pendente revisar por que agora as mensaxes só se envían en inglés, cando antes o envío se facía en galego ou castelán.

Pregamos desculpas por estes erros e lamentamos que ningún dos usuarios ate o de agora detectase ou nos comunicase o erro da ligazón. O tema do idioma eramos conscientes e estabamos á espera de dispoñer de tempo para amañalo, pero do outro non tiñamos noticia.

Esperamos dar amañado ambos temas á maior brevidade.

Debido a que existe un proceso de comprobación de contas de correo electrónico en DeGalicia.org que a nosa asociación puxo en marcha e que rematará máis tarde có prazo dado como límite para as medidas extraordinarias preparatorias da socialización dos galeuros, e dado que existe un importante número de contas posuidoras de galeuros que usan e-mails desde dominio, o Comité Rector vén de decidir que se prorrogue este último prazo para facelo cadrar co primeiro.

Ademais, para acelerar o proceso de desemisión que terá lugar cando se eliminen certas contas de correo en DeGalicia.org, vense de engadir un párrafo no wiki explicando o seguinte:

Se o administrador dos galeuros ten constancia segura dalgunha outra maneira de que unha conta de correo xa non existe, poderá prescindir do envío desas 2 mensaxes de comprobación cun intervalo de 5 días, e procederá á des-emisión inmediata dos galeuros asociados a esa conta.

Xa que logo, o prazo para as medidas especificadas anteriormente, prorrógase ate o día 11 de Xaneiro de 2010.

Debido a problemas de saúde do administrador dos galeuros, non se puideron aplicar os prazos anunciados para as medidas extraordinarias mencionadas hai unhas semanas. Por este motivo, a Xunta Directiva de Fillos de Galicia está a votar unha ampliación do prazo. En breve anunciaremos aquí cal será a nova data límite para as operacións descritas.

Coa autorización da Xunta Directiva da Asociación Cultural Fillos de Galicia (que mentres non culmine o proceso de socialización dos galeuros emprendido recentemente é a responsable de definir o funcionamento da moeda), vimos de poñer en vigor unha nova norma para resolver as situacións das persoas ou entidades que deixan de dispoñer de acceso ás contas de correo asociadas aos seus galeuros.

Como xa sabedes, a identificación única que dá acceso ás contas dos galeuros é o correo electrónico asociada á conta que o/a posuidor/a ten en http://www.galeuros.com/tenda

Tendo acceso a ese email pódense gastar ou trasferir os galeuros, ben sexa por medio da propia tenda ou simplemente enviando unha mensaxe aos administradores. Isto ten como consecuencia que se ese e-mail deixa de estar accesible, pérdese toda posibilidade de acceder a eses galeuros, e polo tanto a conta queda inutilizada. Para que isto non desvirtúe as contas xerais do sistema, a Xunta Directiva aprobou por suxestión do Comité Rector a medida que ao respecto se vén de engadir no wiki: eses galeuros serán desemitidos.

A Asemblea Extraordinaria convocada a tal efecto entre os socios da Asociación Cultural Fillos de Galicia, entidade creadora e ata o de agora responsable única da moeda complementaria galeuro, vén de aprobar o comezo do definitivo proceso de socialización da moeda.

O primeiro paso dentro deste proceso será a redución do límite de emisión que esta entidade ten, ata o de agora situado nos 10.000 galeuros, para o igualar ao que outras entidades teñen: 2.000 galeuros.

Para esta redución, Fillos de Galicia fai un chamamento a todos os posuidores de galeuros para que ates de finalizar o mes de novembro contribúan á desemisión do diferencial existente con ese límite. Calquera posuidor/a de galeuros pode contribuír a este axuste, das seguintes maneiras (por orde de preferencia para Fillos):

1. Usando os seus galeuros (que teñan actualmente en saldo ou novos que poidan emitir se teñen esa capacidade) para:
   • Facer unha doazón a Fillos.
   • Contratar a Fillos / RedeGalega hostings e/ou nomes de dominios.
   • Adquirir parcelas en Parcelaria.com.
   • Contratar publicidade a Fillos de Galicia.
   • Comprar dominios que Fillos ten á venda (serán publicados
     proximamente): como investimento p.ex. para a súa explotación
     publicitaria, revenda ou proxectos propios.
   • Comprar produtos na tenda online de Fillos de Galicia (preferiblemente de produtos en stock: bandeiras da NMG, Antoloxías Poéticas, etc.).
   • Contratación de servizos de desarrollo web a RedeGalega.
   • Pagar cotas de socio/a (tamén se aceptan renovacións adiantadas).
   • Agasallar cotas para que outros amigos se fagan socios (só tes que indicar o seu nome de membro).
2. Solicitando a conversión a euros, á taxa estabelecida do 90% (se dispoñen dese dereito).

Desde hoxe pódese consultar na sección de cifras económicas e financeiras do noso wiki un novo indicador (triplo) de actividade dos galeuros, o que vimos en denominar taxa de emisión, circulación e conversión, e que mide cantos dos movementos de galeuros son circulación entre posuidores con respecto ao total de movementos, cantos son emisións de moeda e cantos conversión desta a euros.

Como se pode observar ao longo da historia da nosa moeda a taxa de emisión mantívose bastante constante en torno ao 50%. Isto quere dicir que practicamente por cada emisión había unha circulación ou unha conversión a euros. Por unha banda isto indica solidez, porque as emisións non superan nunca de maneira importante aos outros movementos da moeda, pero por outra banda fainos ver a necesidade de estimular moito máis a circulación entre posuidores e outras entidades, de tal maneira que o galeuro cumpra mellor coa súa función de medio de intercambio económico. Coidamos que aumentar este factor a niveis de 50%, 70% ou superiores deberá ser un obxectivo da nosa nova etapa.

Como se pode ver ata o de agora a circulación non dá superado á conversión, o que quere dicir que non se move máis o galeuro do que se converte a euro, e iso fainos ver que non ten despegado o seu potencial como moeda de intercambio. Agardamos que a nova etapa dos galeuros permita corrixir esa eiva.

Hoxe vimos de mellorar o aspecto contractual da capacidade de emisión, recollendo ademais da posibilidade de ampliación do límite emisor de galeuros dunha entidade participante, a posibilidade de que esa entidade rebaixe a súa capacidade. Iso é importante sobre todo nunha época de recesión económica, porque é previsible que algunhas empresas ou profesionais que emitan galeuros poidan ver reducida a súa capacidade de facturación por diversos motivos. Desde hoxe o noso wiki recolle esa posibilidade.

Despois de varias semanas de parón debido á reorganización interna e ao mega-proxecto de posta en marcha de Fillos 4.0 estamos retomando o ritmo e o pulo da nosa moeda.

O día 1 de novembro hase celebrar unha importante asemblea de socios da Asociación Cultural Fillos de Galicia, responsable ate agora dos galeuros, onde se someterá a decisión dos socios un importante salto adiante do que informaremos oportunamente unha vez teñamos o resultado da votación.

Por outra banda estamos en fase de reactivación do voluntariado en Fillos de Galicia, aproveitando o tirón de Fillos 4.0 e das facilidades que achega para a participación de todos os seus membros. Así é que agora cada hora adicada a labores voluntarios a prol dos proxectos de Fillos será recompensada con 10 galeuros, que os nosos membros voluntarios poderán gastar na Tenda de Fillos, ou nas outras entidades participantes que aceptan a nosa moeda… cada vez máis moeda de todos os galegos e as galegas (do mundo)!

Agradecemos a paciencia que estades amosando as persoas que estades vendo os movementos de galeuros retrasados por estas incidencias. Vimos de facer trocos no sistema de xestión de tal maneira que poidamos estar agora si, a cotío, atendendo as vosas solicitudes e realizando os apuntamentos de movementos. Grazas!